प्रकाश वामन कामत
पणजे(गोंय)-लेखक, सौंशोधक, भाशातज्ञ आनी गणकतज्ञ शांताराम वर्दे वालावलीकार हांकां कोंकणी भाशा
मंडळाची आर्गां:

कोंकणीचे नामनेचे लेखक, सौंशोधक, भाशातज्ञ आनी संगणकतज्ञ शांताराम वदे वालावलीकार हांकां शेनवारा राती मरण आयले. कोंकणी भाशा मंडळान तांकां आर्गां  ओंपल्यात.
कोंकणी भास, संगणकाचें गिन्यान आनी संस्कृत भाशेची जाण हे वरवीं तांणी कोंकणीच्या मळार सातत्त्यान आपली सेवा दिली. ‘मेघदूत’ हें संस्कृत काव्य तांणी थेट संस्कृत भाशेंतल्यान कोंकणींत अणकारीत केलां. तांणी कविता, कथा आनी लेख बरयल्यात.
शणै गोंयबाब जल्म शती निमतान कोंकणी भाशा मंडळान शणै गोंयबाब हांच्या जीवीत  आनी बरपाचेर उजवाडयल्ल्या ‘वज्रलिखणी’ ग्रंथाचें संपादन शांतारामबाबान केल्लें. गोवा
कोंकणी अकादेमीन समग्र शणै गोंयबाब’ चार खंडांत उजवाडायलां. ताचेंय संपादन तांणी केल्लें.
केंद्रीय मानव संसाधन मंत्रालयाच्या इलॅक्ट्रॉनिक्स विभागा खातीर अस्मिताय प्रतिष्ठानान(गोंय) कांय वर्सांआदीं कोंकणी उतरांची कोठी म्हणल्यार कॉर्पस  हो प्रकल्प तयार करून
दिल्लो. तातूंतय शांतारामबाबांचो हातभार आसलो.
सद्या गोंय विद्यापिठांत युनिवर्सल नॅटवर्किंग लँगवेज ह्या प्रकल्पांतल्या कोंकणी दालना खातीर ते आदार करताले. गोंय विद्यापिठाच्या कोंकणी शब्दमालें (Wordnet) प्रकल्पाचे ते सल्लागार आशिल्ले. मंगळूरच्या विश्व कोंकणी केंद्रा खातीर ऋग्वेदाचो कोंकणी अणकार लेगीत  करपाचें तांचें काम पुराय जायत आयिल्लें.
गोंय सरकाराच्या राजभाशा संचालनालया खातीर
कायदो विशयक शब्दकोश तयार करपाचो वावर तांणी केला.
कोंकणी भाशेचे चळवळींत शांताराम वर्दे वालावलीकार हांचें मोलादीक योगदान आसा.
कोंकणी खातीर निसुवार्थिपणान वावर करपी आनी कोंकणीक म्हायती तंत्रगिन्यानाच्या मळार पावोवपाक मोटो हातभार लावपी शांताराम वर्दे वालावलीकार हांच्या मरणाक लागून कोंकणी मळार एक पोकळी निर्माण जाल्या अशें कोंकणी भाशा मंडळान उजवाडायिल्ल्या प्रसिद्धी पत्रकांत
म्हणलां आनी तांकां आर्गां ओंपल्यांत.
.....